Vieiros

Vieiros de meu Perfil


Edición xeral

RSS de Edición xeral
Máis queixas polo deterioro da sanidade pública

Falseo de datos na atención a pacientes e desmantelamento das áreas sanitarias comarcais

O PSOE denuncia a manipulación de datos oficiais e o BNG demándalle á Xunta que non desartelle as dotacións de Monforte, O Salnés, A Mariña e Valdeorras.

Redacción - 13:45 23/04/2010

"Fai falla botarlle peito para dicir que agora atenden primeiro os doentes máis graves", quéixase Modesto Pose, voceiro de Sanidade do grupo parlamentario do PSdeG. Para Pose resulta "intolerábel" que o Goberno anunciase atención aos pacientes máis graves, algo que á luz das propias cifras oficiais do Sergas "é de todo punto falso".

Ao respecto, recordou o deputado socialista que durante este primeiro ano de Pilar Farjas á fronte da Consellaría de Sanidade a espera aumentou na atención aos pacientes máis graves. Por exemplo, de xeito concreto, a cirurxía cardíaca aumentou de 86 a 92 días, e a cirurxía dermatolóxica –que basicamente corresponde á intervención de tumores-, pasou de 34 a 48 días, os pacientes de neurocirurxía pasaron de esperar 89 a 95 días, e as esperas en xinecoloxía aumentaron 20 días até 71.

Áreas sanitarias comarcais en perigo de desatención
A práctica demostrou que o reforzo das áreas sanitarias comarcais de Monforte, O Salnés, A Mariña e Valdeorras é unha necesidade, mais a estratexia da Xunta non queda clara ao respecto. Baixo a argumentación da presunta mellora de eficacia a través dun modelo de "xestión global", o equipo do PP na Xunta pilotaría o que desde a oposición entenden que é unha clara erosión da atención sanitaria nas mencionadas bisbarras.

Por este motivo, a voceira en materia de Sanidade do grupo parlamentario do BNG, Ana Luisa Bouza, presentou unha iniciativa na Cámara coa que esixe que a Consellaría de Sanidade informe polo miúdo do novo mapa sanitario á vez que reclama que se manteñan as áreas sanitarias de Monforte, o Salnés, A Mariña e Valdeorras, "reforzándoas mediante a súa conversión en áreas integradas".

O Bloque defende que o actual modelo territorial de carácter comarcal é idóneo para a oferta de "máis calidade asistencial" e entende que os recursos humanos e os servizos están así "máis achegados ás necesidades dos habitantes de cada territorio". Xustamente, agora mesmo o Sergas funciona con dúas estruturas, as xerencias de atención primaria, 7 en total, e as xerencias de atención hospitalaria ou especializadas onde a estrutura territorial é de carácter máis comarcal con 11 áreas, entre elas as de Monforte, A Mariña, O Salnés e Valdeorras.

As mudanzas deben ser en prol da mellora do servizo
Partindo da idea de que aceptan que se cree unha xestión integrada do Sergas que coordine a atención primaria e especializada, desde o BNG advirten de que o PP pretendería aproveitar o novo mapa sanitario para "poñer en dúbida o actual sistema integral de atención hospitalaria" e xa que logo as áreas sanitarias comarcais mencionadas.

A deputada nacionalista denuncia o "dobre xogo" de declaracións que desde a chegada ao poder manexa o PP neste sentido, contradicíndose nas súas declaracións os altos cargos da consellaría de Sanidade cos voceiros locais do PP. Ana Luísa Bouza denuncia que a supresión das áreas sanitarias de Monforte, O Salnés, A Mariña e Valdeorras para facelas depender dos centros provinciais implicará na práctica "relegalas e secundarizalas á hora de recibir recursos económicos e humanos". A situación xa provocou a organización de plataformas cidadás nestas comarcas en defensa do mantemento e o reforzo do actual sistema sanitario público.


5/5 (7 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: