Vieiros

O vice-voceiro do Grupo Parlamentario do PSdeG, Xosé Manuel Lage, reclamou que se debata no Parlamento sobre a situación laboral "dos traballadores e traballadoras nos medios de comunicación social" do país.

Nunha interpelación, Lage pregúntase "que medidas ten adoptado o Goberno" pola "difícil situación laboral" deses profesionais, lembrando que "durante o ano 2009 producíronse máis de 100 despedimentos" de xornalistas nos medios de comunicación galegos "e máis do dobre no caso de extincións de contratos".

Lage Tuñas baseouse en datos do informe do ano 2009 que elaboraron o Colexio Profesional de Xornalistas de Galicia e mais o Sindicato de Xornalistas, onde se reflicte, ademais, que case o 40% dos profesionais ten un contrato precario, segundo lembrou o parlamentario socialista, e que polo menos "nun 30% das empresas de comunicación social non hai convenio colectivo".

Por ese motivo, fixo un chamamento á mellora desas condicións, "fundamental para o funcionamento dun sistema democrático", polo que avogou pola "existencia de medios de comunicación fortes e independentes, onde os xornalistas poidan desenvolver o seu traballo en condicións laborais dignas". Na interpelación pregúntalle ao Goberno sobre medidas que tomou ou tomará para mellorar esas condicións "e a situación económica das empresas" de comunicación do país.