Vieiros

Vieiros de meu Perfil


Edición xeral

RSS de Edición xeral
Acordo para a fusión de Caixa Galicia e Caixanova

Pachi Vázquez asegura que o acordo foi posíbel porque o Constitucional bloqueou a lei de caixas

"É un día para estar contentos", afirma o líder dos socialistas, quen valora que se produciu un acordo froito do "diálogo, o consenso e o equilibrio social, territorial e económico".

Redacción - 19:15 11/05/2010

"Alguén nos debe unha desculpa aos socialistas galegos", afirmou esta terza feira o secretario xeral do PSdeG, Manuel 'Pachi' Vázquez, denunciando que o seu partido fora cualificado de "inimigo da fusión" e insistindo en que "se a lei de caixas estivera en vigor a fusión sería hoxe imposíbel".

"Este acordo demostra o acertado da vía do diálogo, o consenso, o aval do Banco de España e o equilibrio social, territorial e económico", defendeu, argumentando que se trata da estratexia que a súa formación avalou "desde o principio" e advertindo de que tería sido "incompatíbel coa lei de caixas de Feijoo". Na opinión de Pachi Vázquez a fusión será posíbel porque a lei de caixas "está nun caixón do Tribunal Constitucional". "Non tería lugar de ter sido aprobada e en vigor, tal e como quería Feijoo", advertiu o líder socialista. Nesa liña, Vázquez entende que a Xunta "rectificou o seu camiño de confrontación inicial para apostar agora polo consenso".

Por outra banda, o secretario xeral do PSdeG felicitou as entidades e agradeceu "o esforzo" que, na súa opinión, "xunto co de concellos e grupos políticos" fará conseguir unha fusión "equilibrada" da que xurdirá unha caixa "querida por todos os galegos" e "avalada e aceptada unanimemente por todos os socialistas galegos".


1/5 (1 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: