Vieiros

Emmanuel Le Merlus, bretón e presidente da asociación 'Unidos na diversidade lingüística' (UDL), partiu a pasada fin de semana de Pondi, na súa terra, en dirección a Kernow, a primeira das 67 nacións sen estado e territorios de Europa con linguas minorizadas que prevé visitar.

Le Merlus, afeccionado ao ciclismo, considera que "a diversidade lingüística é un muro de contención para evitar a uniformización da cultura", segundo recolle o xornal Ouest-France. O obxectivo principal é dar a coñecer a súa lingua, a bretoa, mais tamén para descubrir outras culturas. En cada un dos lugares se ha entrevistar con organizacións vinculadas coa defensa da lingua.

Para a súa viaxe calcula que precisa de 18 mil euros (un euro por cada un dos quilómetros que aproximadamente vai pedalear), dos que xa conseguiu 15 mil grazas ás axudas de escolas Diwan (de inmersión), de administracións locais e do patrocinio dunha entidade financeira do país, e do apoio de figuras históricas do ciclismo como Bernard Hinault.

Ademais de Cornualla, o percorrido inclúe o resto de nacións das illas británicas. De alí viaxará en barco deica Frisia e posteriormente os países escandinavos. Baixará cara ao centro e sueste de Europa. Á Península Ibérica e, concretamente, a Galiza ten previsto chegar no inverno, previo paso por Córsega. O seu periplo rematará coa súa visita a Flandres, para regresar de novo á Bretaña.