Vieiros

“É necesario aproveitar as oportunidades da Cultura en tempos de crise”. Este foi o chamado que fixo Isabel Pires de Lima, catedrática da Facultade de Letras da Universidade do Porto, ex-deputada da Assembleia da República e ex-ministra de Cultura de Portugal (2005-2008) nunhas xornadas celebradas no Consello da Cultura Galega (CCG).

Nun relatorio titulado “A Cultura e o novo mundo”, Pires afirmou que a cultura representa, cada vez máis, un eixo fundamental de desenvolvemento e definición das estratexias tanto económicas como sociais, tecnolóxicas e educacionais. A produción de contidos creativos innovadores, dixo, representan un importante factor produtor de riqueza e de competitividade.

A Cultura ofrece oportunidades
“Ábrese para a cultura un novo mundo”, dixo ao tempo que aludiu as mudanzas que levan a encarar de diferente xeito as estreitas relacións entre a economía e a cultura, mais tamén entre a cultura e educación, turismo ou diplomacia. Nesa liña, lembrou que as sociedades modernas son cada vez máis multiculturais e, en consecuencia, requiren do diálogo cultural para a súa cohesión e para impedir a creación de barreiras entre sociedades culturalmente diferenciadas.

Finalmente, a ex-ministra de Cultura portuguesa considerou de primordial importancia desenvolver unha nova e máis ambiciosa acción para o sector cultural, baseada en estratexias integradas e coordenadas que reforcen a súa ligazón efectiva ó mundo real. Desde a súa análise entende que “as políticas de cultura están destinadas a gañar máis espazo e coherencia na gobernación europea”.