Vieiros

“A presentación pública do hospital de Lugo por Alberto Núñez Feijoo non resolveu ningunha das inquietudes dos lugueses”. Así falou o secretario da área de Sanidade do PSdeG, Miguel Anxo Fernández, despois de que o propio presidente da Xunta censurase unha publicidade publicada polos socialistas nos medios locais chamando a atención sobre esta falta de concreción. En resposta, Fernández apuntou que a publicidade pagada polo Goberno e aparecida na pasada fin de semana nos xornais tivo un custe de preto de 30 mil euros.

O PSdeG cualificou a presentación do novo hospital, o último que contará con financiamento totalmente público en Galiza, como “unha tomadura de pelo” e criticou que a día de hoxe non se coñeza aínda a data de apertura e se contará coas áreas de hemodinámica, radioterapia ou medicina nuclear. Tamén recriminou que os profesionais sanitarios aínda non fosen informados destes detalles e que non se ofrecesen datos sobre o número de persoas que comporán o cadro de persoal do novo centro. Finalmente, Fernández asegura que o acto de presentación foi “unha auténtica posta en escena, unha burla e un teatro”.