Vieiros

Vieiros de meu Perfil


OUTRA VACA NO MILLO

A realidade contada

09:30 31/05/2009

Privados do don da ubicuidade, todo aquilo que aconteza alén dos nosos narices chéganos, se é que chega, contado por alguén. Sucede agora e sucedeu sempre.

Cambiaron os transmisores: noutro tempo, eran arrieiros, afiadores, feirantes, vendedores ambulantes e outros, que trasfegaban as novas dun lugar a outro, dun xeito individualizado e disperso; hoxe, son as empresas de comunicación quen centralizan e controlan a crónica do sucedido.

É característico das democracias que, de xeito periódico, os cidadáns lle teñamos que poñer nota á clase política. A valoración que fagamos vai basearse, por un lado, nas nosas querencias e fobias, e por outro, na realidade contada que nos chegou a cadaquén. E se aceptamos que o colectivo de voto non comprometido –sen querencias apaixonadas nin fobias paralizantes– decide os cambios nas democracias, non semella errado concluír que a información recibida acada unha enorme transcendencia.

Dous exemplos aínda frescos na memoria: o concurso eólico e mailo o desbalde sen traza de Touriño. Eu nunca vin “de corpo presente” o famoso audi fantástico, nin o mobiliario de deseño de Presidencia, nin cheguei a ver diante os centos de proxectos do concurso do vento. Pero dende outubro, día si e día tamén, houbo medios que xuraban que o coche e mailos mobles estaban alí, e que houbera trampa gorda na adxudicación dos muíños. Unha vez que votamos, traballo feito e a outra cousa.

As empresas de comunicación son iso, empresas; e como tal, dotadas de principios, estratexia e, por suposto, con ansia de lucro. Unhas declárano abertamente na súa liña editorial; outras escóndeno baixo unha pretendida inocencia e imparcialidade. Coma nun mercado calquera, o cidadán escolle os ollos prestados que mais lle acaen. Cando pode, porque no caso galego, a metade do electorado –sociatas e nacionatas- non ten lentes da súa graduación. E semella moita xente forzando a vista.

4,75/5 (28 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí:



Xosé Luís Sucasas

José Luís Sucasas

Naceu no ano 1959 en Cadrón, parroquia de tres lugares que son fronteira entre Lalín e Agolada. Na actualidade traballa de administrativo de obra no sector da construcción.



Máis opinións