Somos un territorio único no mundo. Temos un idioma propio, un xeito particular de asentarnos na terra, contestamos preguntando, estamos espallados por todo o planeta e temos a maior concentración de festas populares e gastronómicas por metro cadrado do Universo. Misturamos música, viño e comida como ninguén, levamos no noso código xenético a verbena e podemos presumir de ter as mellores orquestras. Para os galegos e galegas as festas gastronómicas son moito máis que simples exaltacións culinarias; son tradición, folclore, punto de encontro e revolución cultural. Carne, peixe, marisco, verdura, ... Canto máis aperta a calor, máis enchemos o bandullo. Nesta terra pasouse moita fame, pode ser por iso que nas nosa festas populares cómese, bébese, cómese, báilase e vólvese a comer, e non ficamos ledos se non sobra comida para toda a semana. Cada cidade, vila, parroquia e lugar de Galicia, desde A Guarda até Ribadeo, de Vilardevós a Cariño, ten a súa festa gastronómica; e un produto, propio ou foráneo, ao que render sacro tributo e etílica devoción. É por todo isto (e aínda máis) que The Chiquitas queren facer canción do verán este tema sobre o noso feito antropolóxico máis primitivo: xuntarse para comer. Nestes tempos disque de recesión e crises económicas, Galicia enteira bailará este verán o A Polo Ghit das Festas Gastronómicas. The Chiquitas: Sexo, Viño e Colesterol.