Vieiros

A asociación Ponte nas ondas fixo públicos os gañadores do primeiro certame de recolla da tradición oral que organizou nos centros educativos de ensino non universitario do país e de Portugal. A convocatoria coincidiu coa Semana da Literatura Oral que organizou a Consellaría de Cultura. En total, participaron 57 centros de ensino primario, básico, secundario e profesional.

O CRA Amencer de San Paio, Ribadavia, recibiu o primeiro premio na categoría de ensino infantil, e o segundo o CPI de Xanceda, Mesía. Así mesmo, o primeiro premio de ensino básico, o equivalente ao primario en Portugal, foi para a escola de Celorico de Basto. Na mesma categoría mereceu unha mención especial do xurado o traballo elaborado polo CEIP Pombal de Vigo.

En ensino secundario, o IES Francisco Sánchez de Tui levou o primeiro premio, e o CPI Alcalde Xosé Pichel de Coristanco o segundo. No bacharelato, o gañador foi o EIS Aquis Querquernis de Bande, en ciclo superior, Animación Cultural do IES Primeiro de Marzo de Baiona, e en profesional, a Escola Profissional Infante D. Henrique do Porto.

O xurado formado por Xoán Ramiro Cuba, Antonio Reigosa e Xerardo Feijoo, declarou desertos os segundos premios de bacharelato, ciclo superior, ensino básico e ensino secundario por considerar que o resto dos traballos recibidos non se axustaban ás bases.