Vieiros

O Movimento Popular para a Libertação de Angola (MPLA) continúa a liderar cunha vantaxe moi ampla o escrutinio nas eleccións lexislativas angolanas. Segundo a última actualización de resultados, divulgados este domingo pola Comissão Nacional Eleitoral, o MPLA conseguiría o 81,82% dos votos. Este luns ás 12.00 horas está prevista unha nova actualización.

Contabilizados o 89,21% dos votos, deica ás 17.06 horas, a UNITA (10,5%) mantense na segunda posición; séguelle o Partido de Renovação Social (PRS), co 2,95% e A Nova Democracia (1,18%) que supera á Frente Nacional de Libertação de Angola (FNLA), que obtén o 1,12% dos votos.

O presidente da UNITA, Isaías Samakuva, rexeitou aceptar a vantaxe do MPLA cando o escrutinio chegaba ao 50%, afirmando que "neste momento, non é momento para aceptar resultados provisorios". Ademais, afirmou que, en Angola, "existe o dereito á reclamación".

Neste senso, a UNITA presentou unha solicitude de impugnación na provincia de Luanda, logo de que se verificaron irregularidades.

No entanto, a misión de observadores da Comunidade dos Países de Língua Portuguesa (CPLP) considerou que o escrutinio se desenvolveu de "forma transparente e libre" e que malia as "anomalías de orixe técnica" verificadas estas non interferiron na votación.