Vieiros

O foro social Cangas non se vende e a confraría de pescadores da vila do Morrazo convocan unha manifestación este sábado para amosar, unha vez máis, a súa repulsa pola obra do porto deportivo que se pretende construír nas antigas instalacións de Massó, no Salgueirón. A mobilización partirá ás oito da tarde da Alameda Vella.

A organización fai un chamamento á poboación para que se sume ao acto, que pretende alertar polo atentado ecolóxico e "gran pelotazo especulativo" que vai supoñer esa obra, que podería provocar, ademais, a perda de 500 empregos no mar.

Cangas non se vende e a confraría consideran que agora é o momento de parar esa desfeita e de descriminalizar, dunha vez por todas, as persoas que se opoñen a esa construción. Baixo o lema S.O.S. Massó, a manifestación ten previsto rematar perante a obra.