Vieiros

Música "Entre Lusco e Fusco"

Lugo Cultural celebrará un ciclo de concertos que pretenden recuperar como espazo escénico o anfiteatro do Parque de Rosalía e o da Deputación Provincial emprazado no Campus, segundo afirman os organizadores. Desde o 9 e até o 26 de xullo, os asistentes poderán gozar da música de Narf, Snail ou Islabikini, entre outras formacións galegas.

Os concertos comezan ese luns baixo a denominación "Na Memoria". Así, Snail, Islabikini, Touben ou Iván e Josito, todos eles compostos por universitarios lugueses, ofrecerán sendos concertos nun dos espazos a recuperar, o parque Rosalía de Castro. A festa trasladarase no calendario, mais o emprazamento será o mesmo. O próximo día 17 Abraham Boba traerá á cidadade o seu jazz fusionado.

Xa no auditorio aberto do Campus, Marful achegará os seus ritmos o día 19 e Narf farao no mesmo lugar o último día deste ciclo. Todos estes concertos celebraranse ás oito e media do serán. Outra das actividades programadas por Lugo Cultural para este verán é un programa de rotas culturais que se estenderá ao longo de todo o ano. A primeira delas realizarase o día 23 de xullo polo paseo do Miño e nela actuará como guía o escritor Lois Diéguez. Para iso, hai un máximo de 50 prazas e a inscrición está aberta ata o 18 de xullo na Oficina de Cultura da USC na Vicerreitoría de Coordinación do Campus de Lugo.