Vieiros

Un dos actos celebrados co gallo do Día Mundial da Auga estivo protagonizado pola "caravana solidaria", que chegou hoxe a Compostela logo de peregrinar dende o Cebreiro co obxecto de concienciar á poboación cos problemas que provoca a falta de auga no Terceiro Mundo e as malas condicións de salubridade nos países subdesenvolvidos.

Ao remate da peregrinaxe, promovida pola ONG "Acción contra el Hambre" e realizada por vinte escritores e artistas, o grupo formou unha cadea humana con caldeiros de auga na praza do Obradoiro.

O director da ONG organizadora, Olivier Longué, sinalou a importancia da concienciación con este problema porque "a metade da poboación mundial non ten acceso ao saneamento, e un cuarto non ten auga limpa". Longué denunciou que o 80 por cento das enfermidades que matan aos nenos do Terceiro Mundo están vinculadas á inexistencia ou ás malas condicións de salubridade da auga, e que "en moitos sitios, ter auga limpa é máis eficaz que un hospital".

Sobre este tema, a ONG Manos Unidas tamén denunciou que no ano 2002, 1,7 millóns de persoas morreron por falta de acceso á auga para o consumo e servicios de saneamento e hixiene. O 90 por cento dos mortos eran nenos. A ONG sinalou que a maior parte destas persoas vivían en Asia e África, onde os problemas de abastecemento de auga son causa de enfermidades coma o cólera, a diarrea ou os parásitos intestinais.