Vieiros

O CSIC avisa que especialmente os temporais do inverno poderán facilitar que sigan saíndo a tinguir as costas pequechas bolas deste fuel, moi disperso e fragmentado. Os científicos son pesimistas sobre as posibilidades de eliminación destes restos e dous anos despois, aínda está por fixar un novo proxecto que defina con exactitude a cantidade, a localización exacta, así coma os efectos causados nos ecosistemas mariños.

Nunca Máis advirte das eivas e as necesidades en praias, rochedos e fondos mariños. No primeiro caso, advírtese que marisqueiros e mariñeiros veñen retirando chapapote esporádicamente e que existen aínda praias con importante presenza de fuel por baixo do areal. Ao respecto tamén advirten que algunhas actuacións das administracións se realizaron con maquinaria pesada que lle afectou a dunas e lugares protexidos. A necesidade pasa por que as administracións asuman o mantemento de persoal para a recollida sistemática de residuos e por que se traballe na rexeneración dos sistemas dunares.

No que respecta aos fondos, o goberno ten insistido en que xa non hai fuel, información que vén de ser desmentida polos científicos implicados nas investigacións. O único que se limpou sistematicamente foron as illas atlánticas do Parque Nacional e non hai asignacións orzamentarias para seguir estes traballos.

Por outra banda, nos rochedos a aplicación da biorremediación foi moi limitada e debería extenderse a todas as zonas afectadas. Asimesmo, os ecoloxistas teñen denunciado a agresiva limpeza por medio e auga a presión e alta temperatura, que dificulta a fixación dos seres vivos.