Vieiros

Os representantes do Goberno de Lula da Silva e a delegación galega que participa na V edición do Foro Social Mundial coincidiron nas moitas similitudes que existen entre o PT e o deseño orixinario do BNG no ano 1982. Neste sentido, Xosé Manuel Beiras asegurou que "agora que se cumpren 25 anos do nacemento do PT, o BNG tamén pode chegar á Presidencia da Xunta de Galiza".

O Presidente do Consello Nacional do BNG engadiu que "Lula tardou 4 lexislaturas en chegar ao poder, e agora pode ser o momento do BNG". Ao seu xuizo, esta similitude entre ambas forzas políticas "pode ser premonitoria".

Os representantes do PT trasladaron ao nacionalista galego o convite do Presidente Lula da Silva a participar na celebración no mes de marzo dos 25 anos de constitución do partido que na actualidade goberna Brasil.

Esta reunión enmárcase dentro das actividades que o Presidente da Fundación Galiza Sempre desenvolverá ao longo destes días no Foro Social Mundial, onde, asemade e por primeira vez, vai expoñer unha ponencia sobre a defensa das culturas nacionais, da soberanía popular e a extensión da política democrática baixo novas formas de participación, como antídotos imprescindibeis fronte á crecente uniformización de ideas e pensamento.

A delegación da FGS encabezada por Xosé Manuel Beiras, o Director Xerente Xabier Macías e a Portavoz do BNG no Parlamento Europeo Ana Miranda, manterá diversos encontros con diferentes representantes do mundo cultural, político e da comunicación entre os que figuran Eduardo Galeano, Saramago, Ignacio Ramonet ou o Premio Nobel da Paz Adolfo Pérez Esquivel.