Vieiros

Lembrámoslles que o pasado mes de febreiro, o secretario de Estado de Telecomunicacións adiantara que o goberno non consideraba a banda larga unha infraestrutura básica da que debera asegurar o fornecemento ao 100% dos cidadáns. Así, Francisco Ros opinaba daquela que "non ten sentido levar redes a onde o cidadán non está disposto a usar nin necesite a banda larga".

Poucos días despois, e fronte á polémica aberta por estas declaracións, o ministerio de Industria presentaba
un plan para estender a banda larga, do que se avanzaba, permitiría levar a alta velocidade a máis do 90% dos concellos galegos. Xa que logo, os fondos europeos do programa FEDER da UE servirán finalmente para o financiamento desta iniciativa nas comunidades incluídas coma "Obxectivo 1".

O programa para a "banda larga en zonas rurais e illadas" que agora se publica complementará ademais as propias accións desenvolvidas a nivel rexional, os programas de "internet rural" e a campaña "Todos en internet". O proxecto baséase na concesión de axudas aos operadores de telecomunicacións, que financiarán infraestruturas e equipamentos que garantan a dispoñibilidade do servizo en toda a xeografía galega. As subvencións non estarán condicionadas a solucións tecnolóxicas determinadas, polo que poderá aplicarse en cada caso a que se considere máis axeitada. A través da Federación Estatal de Municipios e Provincias, os concellos poderán avaliar as estratexias e o proceso de aplicación.

Lembrámoslles que unha vez que a posibilidade do acceso estea garantida, queda por solucionar a baixa taxa de penetración das conexións de alta velocidade, estatística na que Galiza, a case tres puntos da media estatal, é pechacancelas só un chisco por riba de Castela A Mancha, Castela León e Estremadura.