Vieiros

O prefecto do antigo Santo Oficio, o bávaro Joseph Ratzinger, de 78 anos, é o novo papa da Igrexa Católica. Despois de só dous días de votacións, cando menos os dous terzos dos 115 cardeais optaron polo representante da liña máis ortodoxa da Igrexa Católica. O novo papa escolleu o nome de Bieito XVI. É o primeiro papa alemán desde hai 500 anos. O último papa Benedictus, o XV, chamábase Giacomo della Chiesa e ocupou a cadeira do Vaticano entre os anos 1914 e 1922. A elección de Ratzinger é unha vitoria dos sectores máis tradicionais da Igrexa e unha decepción para aqueles colectivos eclesiais que esperaban un papa que empredese un proceso de reformas tanto na estrutura xerárquica da igrexa como en cuestións de doutrina moral. O colega de Ratzinger na Universidade de Tubinga durante tres anos, e un dos reprimidos pola xestión do novo papa do "depósito da fe", o teólogo Hans Küng, recoñeceu que a elección de Bieito XVI é unha "desilusión" para moitos católicos que esperaban "un papa pastoral e de reformas".