Será o próximo día 8 de maio en Santiago de Compostela, e convertirase no primeiro gran acto da precampaña popular, con previsíbel asistencia do presidente do partido, Mariano Rajoy: a proclamación oficial de Manuel Fraga coma candidato do PP á presidencia da Xunta. Promesas de pleno emprego, cavilacións sobre como entrar a apañar voto nas áreas urbanas e aceleración da axenda para a emigración son outras novidades na actividade do PPdeG.
Fraga é o único dos tres aspirantes que aínda non foi oficialmente declarado candidato no seu partido. Con tal motivo, os populares celebrarán a que en realidade sería a segunda gran xuntanza de líderes do partido nas últimas semanas, logo do cumio anti-Zapatero realizado tamén en Compostela cando aínda non se confirmara o adianto electoral. Para pouco despois, a axenda fraguiana para mediados de maio ten tamén cita fixada en Arxentina e Uruguai, a onde viaxará para estimular o voto da emigración ao PP. Ao respecto, o propio Fraga destacaba este luns o informe enviado polo conselleiro de Emigración arredor do éxito de convocatoria do acto electoral convocado polo PP en Uruguai, "con asistencia de 1.500 persoas", e no que estiveron presentes entre outros o vicepresidente da Deputación de Pontevedra, Xosé Manuel Figueroa e os alcaldes de Ferrol e Ourense.
"Queremos facer de Galiza, unha gran cidade, con grandes áreas metropolitanas", con esa prioridade saiu Manuel Fraga da xuntanza do comité de dirección do PPdeG, ao tempo que anunciaba que o programa electoral non estará listo antes de dúas semanas e que descartaba asistir a un debate cos candidatos de BNG e PSOE: "En Inglaterra nunca os houbo e é o país máis organizado politicamente".
"Pleno emprego, estábel e de calidade" será un dos principais obxetivos de goberno vendidos en campaña polo PP, segundo avanzaba tamén este luns Manuel Fraga, quen detallaba o proxecto de investimentos de cinco millóns de euros para a modernización das oficinas de emprego e un plan de emprego feminino. Ao tempo, tamén neste punto a estratexia do PP pasa por laiarse da presunta "marxinación en materia de emprego" á que o goberno Zapatero estaría somentendo a Galiza. Segundo Fraga, "a modificación de criterios de asignación de fondos do Goberno Zapatero para políticas activas de emprego supuxo que Galicia deixara de pericibir preto de dous millóns de euros".