O comisario de policía de Londres, Ian Blair, confirmou que os atentados do xoves causaron máis de 50 mortos e explicou que non se pode dar un balanzo definitivo porque hai atrancos para acceder a algúns dos lugares atacados, entre eles, a estación de metro de King's Cross. Pola súa parte, o ministro do Interior, Charles Clarke, recoñeceu que a policía e os servizos de intelixencia británicos carecían de información sobre a posibilidade dunha operación terrorista en Londres. Asegurou que a policía está investigando as circunstancias do atentado e non desbota que fose causado por terroristas suicidas ou que os explosivos fosen activados mediante teléfonos móbiles. Case todas as liñas de metro e autobuses da capital británica están abertas , pero o transporte está restrinxido nas áreas dos atentados. Un día despois de que Londres fose elixida como sede das Olimpiadas de 2012 e mentres os presidentes do G-8 están reunidos perto de Edimburgo, os estouridos provocaron o peche do servizo de metro en toda o centro da cidade. A primeira explosión tivo lugar ás 9:50 horas da mañá (hora galega). Al-Qaeda reivindicou os atentados a través de comunicados a distintos medios de comunicación.