Vieiros

O total de títulos publicados no noso país durante o 2004 ascende a 2.618 dos que 1.849 están escritos en lingua galega o que supón que arredor do 57% dos libros publicados en Galiza escríbense ademais na súa lingua. Unha cifra positiva que non marca só o aumento da edición senón que tamén saca á superficie a boa aceptación das novidades literarias entre o público galego, e así o salientaba Manuel Bragado.

O vencello entre o mundo da edición e o ensino queda un ano máis patente nas valoracións da AGE, que destaca que "no ano 2003 o 60% do publicado en Galiza xiraba arredor do mundo do ensino e no 2004 esa porcentaxe foi de, aproximadamente, o 50%".

Pero a crise da edición privada, que supón o 90% dos libros editados no país fronte a un 10% de edición pública ou institucional, segue en aumento promovida por unha perda de facturación anual e polo descenso da tirada media. Unha situación agravada ademais, segundo destacaron tanto Bragado como Fernán Vello, pola desaparición do prezo fixo do libro que leva ás grandes superficies a ofrecer descontos de ata o 25% no prezo dos libros en detrimento do pequeno comercio libreiro.

Dende a AGE deféndese a recuperación do prezo fixo para os libros destacando que a literatura non é tan só "un ben mercantil senón que tamén é un ben cultural", que precisa segundo Miguel Anxo Fernán Vello "un prezo único e independente das épocas do ano ou do establecemento no que se comercialice tal e como acontece co prezo dos xornais ou incluso do tabaco".