Vieiros

O mozo coruñés, de 28 anos, tería recibido na súa casa da rúa Pascual Veiga, na Agra do Orzán, unha carta con acolchamento que contiña o explosivo. Segundo as primeiras informacións policiais, seu irmán subíralle o sobre da caixa de correo momentos antes do estoupido, que se produciu contra as 15h. Trasladado ao hospital, o último parte médico asegura que o mozo evoluciona favorabelmente dentro da gravidade, tén os tímpanos rotos e lesións en mans e ollos. Fontes da investigación citadas por varios medios, que vencellan presuntamente ao mozo con movementos independentistas, din non descartar a posibilidade de que fose el mesmo quen manipulaba o artefacto no canto de terlle chegado polo correo. A policía investiga arestora o tipo de explosivo utilizado e tenta determinar se o sobre era unha carta-bomba dirixida ao mozo ou se contiña material para montar un artefacto explosivo.