Vieiros

Nunha das salas do Centro Galego de Arte Contemporánea ateigada por máis de 300 persoas, ambos líderes fixeron a súa aparición polo corredor central entre os aplausos dos asistentes. Dirixíronse posteriormente á mesa onde asinaron o texto do acordo rodeados dos xornalistas gráficos. De seguido, Anxo Quintana tomou a palabra para afirmar que a asinatura do acordo significa "o primeiro paso" da rexeneración democrática pola que votaron maioritariamente os galegos e as galegas o pasado 19 de Xuño.

Quintana entende o pacto de goberno como un contrato cos cidadáns
Quintana mostrou a súa convición de que a concertación entre nacionalistas e socialistas vai dar lugar a un executivo "que trará respecto polo país e que aprofundará no autogoberno, desde unha concepción segundo a cal canto máis autogoberno teñamos, máis benestar teremos". "A obriga do Goberno será a de facer cada vez máis profundo o autogoberno nacional", dixo.

"Coa asinatura solemne deste acordo de Goberno damos o primeiro paso na dirección da rexeneración democrática que nos marcaron os cidadáns o pasado 19 de Xuño. Vimos de asinar un acordo transparente, un acordo con luz e taquígrafos. Deixamos así atrás outro tipo de acordos, aqueles que se asinaban na escuridade, en cuartos pechados, sen dar nunca conta deles á cidadanía", acrecentou Quintana.

"Podemos felicitarnos todos e todas de que agora teñamos un acordo que é un contrato coa cidadanía, un contrato que xa non nos pertence a nós, nen ao PSdeG nen ao BNG, que lle pertence a partir de agora á sociedade", alegou. O líder nacionalista celebrou que "dúas forzas políticas distintas, con proxectos estratéxicos diferentes e programas dispares, teñan sido capaces de, desde a responsabilidade, concertar pontos de vista e ler acaidamente a vontade cidadá expresada o pasado 19 de Xuño".

Quintana mostrouse convencido de que o bipartito vai lograr que Galiza sexa respectada no Estado. "Rematou a época dos gobernos chorimiqueiros, rematou a época da confrontación pola confrontación. Imos defender os nosos intereses con lealdade institucional, mais tamén desde un espírito de colaboración exixente. O fundamental é termos respecto por nós mesmos, para conseguir que se nos respecte desde Madrid. Se deixamos de ollar tanto para Madrid, e se nos temos respecto a nós mesmos, conseguiremos sen dúbida que desde Madrid se comece a ollar para nós", engadiu.

O bipartito vai ser un Goberno que sabe que "temos un país rico, cheo de recursos e de potencialidades". "Imos ser un Goberno que camiñará ao lado da sociedade, que terá intervención pública nas áreas en que sexa preciso e que axudará tamén aos emprendedores a tirar os seus proxectos adiante", acrecentou.

O líder nacionalista rematou o seu discurso cunha invocación á figura histórica de Castelao. "Lembrando ao noso Daniel quero dicervos que ninguén lle poña chatas ao obra denantes de ser comezada. Hai sitio para todos. Este será o goberno da cidadanía e anímovos a todos e a todas a botardes unha man na tarefa", concluíu.

Touriño comprométese o ser un garante do pacto de goberno
Para finalizar o acto, Touriño comezou o seu discurso sinalando que o 19 de xuño "Galicia votou cambio, abrir unha nova etapa na historia da nosa comunidade. A que era unha maioría social, como é normal en democracia, traducíuse nunha maioría política, nunha maioría parlamentaria. O acto que hoxe celebramos aquí representa a firme vontade compartida por ambas formacións políticas de ser fieis ó mandato da cidadanía expresado nas urnas".

"Ambas formacións falaron, dialogaron entre si, atoparon espazos para o encontro e a converxencia de propostas. En definitiva, fixeron un esforzo de recoñecemento mutuo para alumear ese pacto que hoxe comprometemos diante da cidadanía da nosa comunidade. O 19 de xuño Galicia dixo: acordo, sexan capaces de alumear esa esperanza de alternativa, de renovación e de progreso para o país. E cumprimos, e hoxe acabamos de asinar ese gran acordo nacional de progreso, de benestar e de impulso do goberno de Galicia", engadiu.

Para Touriño, o novo goberno "nace xustamente dun esforzo conxunto e histórico por compartir, por sumar, por integrar, por unir. un tempo novo na historia do país como obra compartida e colectiva. Por iso creo que será un tempo novo na historia do noso país".

E tamén será un tempo de historia "porque detrás desta firma existe unha gran forza. Detrás existe o inmenso depósito de responsabilidade e confianza, de 867.000 votos de cidadáns galegos. Atrévome a dicir un inmenso depósito de algo máis: de ilusión, esperanza e enerxía dun país que cre en si mesmo, e que quere avanzar en progreso, en unión e liberdade".

"Adquirimos hoxe, polo tanto, unha extraordinaria responsabilidade, por esa inmensa enerxía deste país, que acaba de dar unha gran proba de madurez e de desexo de alternancia democrática, de facer posible o que ata agora non fora posible nesta terra: o que é a normalización democrática plena, de tal maneira que o cambio democrático fose tamén un valor exercido a partir do voto nas urnas".

"Estou seguro de que aquí", afirmou, "neste Centro Galego de Arte Contemporánea, símbolo de modernidade, de cultura e de liberdade, de apertura ó futuro e á esperanza, preto, como dicía Anxo, de San Domingos de Bonaval, concéntranse e exprésanse os soños, as entregas, a historia de milleiros e milleiros de cidadáns deste país, que ó longo do tempo, desa obra colectiva que é a nosa Galicia, foron quen de ir construíndo unha vocación, unhas ganas e unha enerxía que o 19 de xuño se transformou nesa vontade inequívoca de abrir ese período de renovación e de cambio en Galicia".

As súas últimas palabras foron "para comprometer por enriba de todo a vontade inequívoca que me embarga, a vontade de ser un garante de cumprimento do contrato que hoxe acabamos de asinar. Por enriba de todo, o meu compromiso terá esa dirección e ese obxectivo: garantir a cultura da coalición, a convivencia política, a unidade de acción e que o goberno sexa o goberno que a historia, o país e a cidadanía demandan, o goberno da unión, da convivencia, da pluralidade, da tolerancia e que faga dar un salto histórico a Galicia e ó seu autogoberno, así como ó seu papel en España, no mundo e en Europa".