Edición xeral
Filharmonia e poemas para a cerimonia do cambio
"Tentará reflectir o xeito de entender a política do novo tempo que se abre en Galicia: democrática, moderna, culta e transparente", anuncian dende a organización do acto oficial de toma de posesión de Emilio Pérez Touriño coma presidente da Xunta de Galiza, o próximo martes. Desta vez non abouxarán o Obradoiro os seis mil gaiteiros que hai catro anos sopraban para tratar de poñer en segundo plano aos manifestantes que daquela se deron cita á beira da praza para unha protesta anti-LOU. A Real Filharmonía de Galicia, o pianista Lorenzo de los Santos e o gaiteiro Suso Vaamonde protagonizarán o apartado musical, nun evento que mesturará as artes escénicas e audiovisuais e incluirá a lectura de poemas de Pimentel.
"Emilio Pérez Touriño, valerase das artes escénicas e audiovisuais, así como da música e da poesía, para intentar reflectir o xeito de entender a política no novo tempo que se abre en Galicia", anúnciannos, "será un acto, non obstante, marcado pola sinxeleza para dar conta do sentir de normalidade civil na asunción do poder". A cita é o martes 2 de agosto ás 13h30, na praza do Obradoiro.
Os socialistas encargaron "un espazo arredor das ideas de biodiversidade; o valor do territorio e o desenvolvemento sustentábel", tarefa para a que requiriron dos servizos para a dirección de Miguel Piñeiro, o arquitecto Fernando Blanco e a directora de arte Marta Villar. Ademais, a actriz María Pujalte será encargada de ler dous poemas de Xavier Seoane e Luis Pimentel, nun acto que contará coa intervención do propio Touriño.
Das seis mil gaitas pásase nesta volta a unha soa, a do gaiteiro do Instituto Galego das Artes Escénicas e Musicais, Suso Vaamonde, que recibirá aos convidados co son da Real Marcha do Antigo Reino de Galicia. A TVG retransmitirá en directo a toma de posesión.
Sen comentarios
Novo comentario
Se xa tes o teu nome en Vieiros, podes acceder dende aquí:
Máis Alá, Fwwwrando, Galego.org, GZ-Deportiva, Canal Verde, Lusofonía, Irimia, Cartafol, Murguía
RSS
| Que é Vieiros?
| Que é o RSS?
| Creative Commons
| Publicidade
| Director
| O equipo
| Contacto