Vieiros

Segundo Núñez Feijoo, os populares "propuxeron un pacto polo financiamento da Sanidade" e coincidiron co resto de grupos parlamentarios na necesidade de "sumar esforzos, trascender partidismos e chegar a acordos". Así, Feijoo queixouse de que os socialistas non propiciasen que ese acordo puidese definirse con tempo antes da propia Conferencia de Presidentes. "Pode chegarse a un pacto en 24 horas?", inqueriulle a Touriño lembrándolle que a primeira proposta chegada desde Madrid se produciu a semana anterior á xuntanza. "Pode chegarse en 24 horas?", insistiulle en referencia á convocatoria que o goberno galego lle achegou a PP e BNG para unha reunión tres días antes de que Touriño marchase á Conferencia.

Feijoo fixo repaso dos criterios defendidos polo presidente da Xunta e opinou que respecto ás transferencias do Estado "non se produciu ningún avance sobre a proposta inicial" e subliñou que a cláusula de garantía "non significa que imos recibir máis cartos, senón que non recibiremos menos". Ao tempo, laiouse de que "Galiza perde peso relativo no financiamento sanitario logo desta Conferencia" en relación ao resto de autonomías.