Vieiros

Quintana indicou que a Xunta "está no camiño adecuado" e que o traballo "aínda non rematou", porque hai que "desmantelar todos os chiringuitos varios que montou Fraga", en alusión ás fundacións e entidades creadas durante o anterior goberno. "Parécelle lóxico que o presidente dun deses organismos cobre máis que o presidente da Xunta?", preguntoulle ao deputado popular.

"Adelgazar e racionalizar a administración galega é un compromiso deste goberno que imos a cumprir", subliñou o vicepresidente, "isto non fixo máis que empezar", e engadiu que este compromiso do novo Goberno inclúe tamén "reducir o gasto para aforrar, por exemplo en propaganda". Neste apartado o vicepresidente reprochoulle ao anterior Goberno que "xa o gastaron todo" e sinalou directamente ao deputado popular Alberto Núñez Feijoo porque no seu departamento durante a pasada campaña electoral "contrataron propaganda por importe de 250.000 euros, 150.000 deles en medios de comunicación da provincia de Pontevedra, por onde vostede se presentaba".

Pola súa parte, Núñez Feijoo criticou que "só" se reducira até agora un alto cargo respecto do goberno anterior, ao pasar de 76 a 75. "Xa me dirá vostede onde vai sacar os 1.000 altos cargos e os 90 millóns de euros", retrucoulle a Quintana.

O deputado popular tamén sinalou que o que antes era a súa consellaría, a de Política Territorial, dividiuse en tres, "polo tanto, hai tres novos xefes de gabinete e tres xefes de prensa. Vaia redución", engdiu.