Vieiros

O obxectivo do certame é a promoción da creación poética, tanto en galego como en castelán. Ao longo dos seus 25 anos de existencia, este premio literario tense establecido como un dos máis prestixiosos a nivel internacional. Así o amosan os numerosos traballos presentados en cada convocatoria, dende diferentes países do mundo. Na edición de 2005 optan ao galardón 144 traballos –42 en galego e 102 en castelán-.

Os organizadores desta semana literaria, que se desenvolverá por primeira vez na sede da Fundación Caixa Galicia, elaboraron un completo programa de actividades. Este deu comezo o luns día 3, cunha conferencia a cargo da escritora Soledad Puértolas.

O martes 4 será a quenda de Teresa Moure. Doutora en Linguüística Xeral, exerce a docencia nas facultades de Filoloxía e Filosofía da Universidade de Santiago de Compostela. Moure ten publicado máis dunha ducia de traballos sobre a súa especialidade, así como ensaios –A palabra das fillas de Eva, Outro idioma é posible, premio Ramón Piñeiro de ensaio 2004- e novelas –A xeira das árbores, premio Lueiro Rey de novela curta 2004, Herba moura, premio Xerais de novela 2005-. A partir das 20:00 horas, Teresa Moure ofrecerá na sede da Fundación Caixa Galicia a conferencia Por unha nova estética da natureza.

No mesmo escenario, Ana María Matute protagonizará a xornada do día 5. As obras de narrativa desta escritora, traducidas a máis de vinte idiomas, teñen colleitado galardóns como o Café Gijón, Premio da Crítica, Premio Miguel de Cervantes, o Nadal ou o Planeta, entre outros. Matute, elixida membro da Real Academia Española en xuño de 1996, ofrecerá unha charla a partir das 20:00 horas.

O xoves, como peche de esta semana das letras, terá lugar o fallo desta XXV edición do Esquío. A cerimonia dará comezo cun concerto do violoncelista Carlos Ariel Gracia Báez. Ao seu remate procederase á lectura da acta e a apertura das plicas para coñecer o nome dos gañadores do galardón. Cada un dos primeiros premios, nas modalidades de lingua galega e castelá, están dotados con 9.000 euros e a publicación da obra na colección Esquío. A entrega dos galardóns e a presentación das obras gañadoras terá lugar no mes de decembro.