Vieiros

Carod-Rovira defendeu a necesidade da reforma do Estatut "para facer fronte aos desafíos dunha sociedade moderna e democrática do século XXI". De feito, segundo Carod, o Estatuto actual non recolle ningún apartado sobre a relación de Cataluña coas institucións europeas, nin sobre a problemática da inmigración, as novas tecoloxías nin as grandes infraestruturas. Todos estes asuntos están recollidos no novo Estatuto e por ista razón, para Carod, este proxecto convértese "no instrumento imprescindíbel para garantir a mellora das condicións de vida dos cidadáns".

"Non é un Estatuto contra ninguén nin de confrontación, senón de diálogo", afirmou Carod, e "persegue un modelo de convivencia con todos os pobos do Estado". O líder de ERC utilizou a metáfora da "casa común" para concluír que "imos compartir a casa, pero en igualdade de dereitos".

Carod fixo unha ampla referencia ás "mentiras e tópicos" que só buscan o "interese electoral" e mostrou o seu cansazo por escoitar nos medios de comunicación españois e aos representantes políticos das formacións españolistas os mesmos argumentos contra Cataluña "que se ouvían a comezos do século XX". "Cansa tanto dicir obviedades década tras década", engadiu Carod Rovira, quen asemade preguntou: "Por que razón os mesmos que nos chaman españois nos tratan como estranxeiros?".