A representante do Partido Socialista Catalán na delegación do Parlament que defende este mércores o novo Estatut no Congreso, afirmou na súa intervención que Cataluña "non é unha nación sen Estado, porque xa ten o seu Estado: o español", definindo a España coma unha "nación de nacións" e subliñando que "a nación catalana non nega a española, senón que a enriquece".
"Onde está o problema, onde a ameaza?", preguntouse a deputada catalana. "Bótasenos de España cando só se concibe un Estado uniforme e pechado", advertiu. Manuela de Madre criticou a quen prefire "a manipulación no canto da política" e ofreceu a "man aberta do Parlament para que a estreiten e non para que a desprecien". "Confiamos na súa capacidade negociadora", pediulles aos deputados do Congreso.
Manuela de Madre insistiulle aos asistentes na necesidade da súa implicación no proceso de reforma estatutaria en Cataluña. Criticando a visión unitaria do Estado español que desde algúns sectores se defende e lembrando a España "franquista que me botou da miña terra", en referencia ás orixes da súa familia en Andalucía, a deputada do Parlament pediu respecto para unha proposta de Estatut que "é respectuosa coa Constitución española". De Madre precisou que se "é preciso revisar esa proposta" será necesario facelo "co traballo de todos".