Vieiros

"O Estatut vai na direción de construír un Estado diferente á mítica, irracional, dominante e agresiva concepción de España, que especialmente neste momento, se espalla desde o púlpito á cátedra dos meios de comunicación", reflexionou Francisco Rodríguez. Na súa intervención, o voceiro nacionalista tamén destacou que "Galiza está máis interesada ca ninguén no debate estatutario" afirmando que os galegos "queren saír de 25 anos de submisión e da idea de España que lles negou as súas potencialidades, saír da resignación e intoxicación que nos ve coma pobo subsidiado e do tópico de existirmos pola solidariedade de España". "O Estado soportámolos todos cos nosos impostos e Galiza quere autoresponsabilizarse", concluíu ao respecto.

"Está obsoleta e superada", dixo o deputado do Bloque sobre á Constitución, referíndose ademais ás reflexións de Castelao sobre a identidade catalana, vasca e galega subliñando que "non é un delicto que deba reprimirse nin unha enfermidade que poida curarse, é unha proba de vitalidade dun órgao que reclama garantías legais para funcionar dentro do Estado e o Estado ten que ser o resultante funcional dos seus varios órgaos nacionais".