Vieiros

Creado xa que logo para afrouxar taxas para os conductores das vías catalanas, para onde a pasada semana CiU rabuñaba outra concesión do goberno español por valor de 12 millóns de euros e coa fin de rebaixar peaxe na AP-7 á altura de Mollet, outras comunidades coma Galiza poderían usar desta posibilidade.

A petición inicial de Esquerra solicitaba que o fondo recibise ingresos das taxas que pagan as propias empresas concesionarias, iniciativa que finalmente non irá adiante segundo ese modelo. Logo dos acordos dos gobernos estatal e autonómico coas empresas, o custo avaliado do rescate das peaxes podería ser financiado cun crédito extraordinario.

Para o caso concreto de Cataluña, o deputado de ERC promotor da demanda, Joan Puigcercós, cavila que o fondo habería de recibir inicialmente cando menos 50 millóns de euros. A medida aplicaríase prioritariamente nas bautizadas "peaxes maduras" por levaren moitos anos en activo.

Lembrámoslles que a Plataforma Cidadá pola Supresión da Peaxe pediu desde Galiza a pasada semana unha xuntanza co ministerio de Fomento para tratar da promesa de gratuidade da peaxe en Rande. Na carta remitida ao ministerio de Magdalena Álvarez sublíñanlle que a ponte de Rande é o único acceso entre o norte e o sur da ría de Vigo e lémbranlle que o investimento realizado para a construción do treito é amortizado cada ano co tráfico que a vía está xerando na actualidade. Ao tempo, lémbranlle que noutras zonas do Estado xa se atenderon reclamacións similares rebaixando prezos ou mesmo directamente suprimindo as peaxes.