Vieiros

De "paso histórico" cualificou o socialista Fernández Moreda a súa presencia no Parlamento galego este xoves, a primeira ocasión en que un presidente de Deputación acode á institución para dar contas nunha comisión. A ausencia dos presidentes en Pontevedra, Lugo e Ourense serviulle de paso ao deputado do PSdeG Ismael Rego para dubidar da claridade das contas das súas respectivas deputacións, que na súa opinión non resistirían a comparación coa solvencia das contas coruñesas.

Desde a oposición do PPdeG, o deputado Manuel Ruíz Rivas insistiu en que os presidentes das deputacións non tiñan á obriga de responder a esta chamada e asegurou que a comisión parlamentaria se excedera nas súas atribucións ao convocalos. Por este motivo, a presidenta do Parlamento, Dolores Villarino, solicitou dos servizos xurídicos da Cámara a elaboración dun informe sobre a solicitude de comparecencia dos tres políticos populares.

Ao respecto, desde o BNG, a deputada Tareixa Paz insinuou que a ausencia de Louzán, Cacharro e Baltar ten que ver coa súa resistencia a amosaren as contas das deputacións e acusounos de "desprezo a unha institución que representa a todos os cidadáns". Sobre o mesmo asunto, o voceiro do Bloque, Carlos Aymerich, subliñou que as deputacións son "institucións tan caducas coma Manuel Fraga".

Lembrámoslles que o pacto de goberno entre PSdeG e BNG inclúe a vontade de aprobar unha "Lei de Coordinación das Deputacións", norma que tería o obxetivo de controlar os fondos que manexan estas entidades.