Comezou en París a cerimonia de proclamación das Obras Mestras do patrimonio inmaterial da humanidade. En breves momentos coñeceremos a resolución da Organización das Nacións Unidas para a Educación, a Ciencia e a Cultura, a Unesco. É a terceira vez que a institución internacional concede esta distinción da que xa gozan 47 espazos, artes ou tradicións en todo o planeta. As tradicións orais galego-portuguesas aspiran este venres a entrar nesa lista. "Pase o que pase o importante é que estamos aquí", gaban os promotores candidatura. Galiza e Portugal prepáranse para a festa. Ao final, o goberno galego estará presente en París no acto de proclamación das Obras Mestras da Humanidade co vicepresidente da Xunta, Anxo Quintana, a conselleira de Cultura, Ánxela Bugallo e o secretario xeral para a Emigración, Manuel Luís Rodríguez, en quen delegou Touriño a representación da presidencia da Xunta.