Vieiros

Vieiros de meu Perfil


Edición xeral

RSS de Edición xeral
INFORME DA AXENCIA EUROPEA DE MEDIO AMBIENTE

O maior cambio climático en Europa dos últimos cinco mil anos

Ao tempo que os grandes números da economía condicionan os debates que en Montreal avalían os incertos compromisos co tratado de Quioto, a Axencia Europea de Medio Ambiente aproveita para facer público un informe relativo ao continente onde advirte que "o cambio climático xa está en marcha", subliñando que o clima europeo sofre os seus maiores cambios dos últimos cinco mil anos e agoirando unha suba de temperatura de entre 2 e até 6 graos para este século. Ao fío, a vicepresidenta da Comisión Europea recordou que a contaminación provoca a morte "prematura" duns 370 mil cidadáns europeos cada ano e lembrou que os défices ambientais en Europa contribúen a degradar outras zonas do planeta.

- 07:53 30/11/2005
Tags:

Jacqueline McGlade, directora da Axencia Europea de Medio Ambiente, relatou na presentación deste informe que a UE debe comprometerse con estratexias a máis longo prazo dos obxetivos fixados para Quioto, que non van máis aló de 2012, e destacou ademais que o cambio climático é un problema global, que non ten fronteiras e que nese sentido debe ser tratado o problema. O estudo promovido pola Axencia fai análise do ambiente en trinta países do contorno europeo e avalía tamén as políticas desenvolvidas nos últimos anos polos seus gobernos.

O abrollo cada vez máis habitual dos fenómenos meteorolóxicos extremos, as secas continuadas, asolagamentos, a perda de xeo nos polos... Son todos indicadores que segundo este informe confirman que o cambio climático xa está en marcha e avisa que o aumento de case un grao nas temperaturas medias europeas será no século que entra de ata seis graos. McGlade explicou que a estrutura económica e o xeito de vida dos cidadáns están por tras da maioría de problemas ambientais e xa que logo o informe chama a esforzarse na "concienciación" dos cidadáns. "Nunha economía a cada paso máis globalizada as decisións dos consumidores aféctanlle cada vez máis ao medio ambiente, e non só ao europeo, senón ao do resto do planeta".


Ligazóns

0/5 (0 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: