Vieiros

Guadi Galego e Guillermo Fernández
O xoves sae á venda Espido, o novo proxecto discográfico destes dous membros de Berrogüetto, do que xa probamos algo en directo no espectáculo Ao pé da letra. Espidoexplora novos camiños dentro da música que se está a facer en Galiza, a través da sinxeleza e da sinceridade que aportan a guitarra e a voz, únicos instrumentos que se utilizan neste proxecto autoeditado que corre parello ao da banda da que forman parte, que prepara novo disco para o seu décimo aniversario na primavera do 2006.

Ouvirmos
A primeira editora especializada en documentación musical galega, vén de tirar "Os gaiteiros de Soutelo", un CD-Libro patrocinado polo Consello da Cultura Galega que recolle as gravacións dos máis míticos gaiteiros galegos e que se suma a outros discos xa editados dentro da súa colección A Tiracolo, como a coral Aires da Terra ou a charanga Los Monfortinos, e que se poden mercar a través da web da discográfica.

O Fiadeiro
Esta asociación cultural viguesa presenta o seu primeiro disco no que recollen o traballo etnográfico que levan feito nos últimos anos, en forma de cantos de pandeiro e pandeireta ou melodías de gaita e charanga. O disco será presentado con dúas actuacións en directo do colectivo esta fin de semana, a primeira o venres no auditorio Caixanova de Vigo ás 22.30 e a segunda o sábado á mesma hora na sala Capitol de Santiago.