Vieiros

Pechados os colexios electorais de Gaza e Cisxordania, a participación nestes comicios lexislativos acadou o 77,7%, segundo recolle a Comisión Electoral Central de Palestina. As primeiras enquisas a pé de urna outórganlle a Al Fatah o 40% dos votos, mentres que Hamas se faría co 30% dos votos. As sondaxes anteriores prognosticaran que o partido do actual presidente da Autoridade Nacional Palestina, Abú Mazen, conseguirá 59 dos 132 deputados do Parlamento palestino, mentres que Hamás recurta diferencias e acadaría até 54. Con dúas ducias dos máis de setecentos candidatos presos en cárceres israelís, algo máis de 1.3 millóns de palestinos deciden este mércores o resultado final, coas denuncias de corrupción a membros de Al Fatah recurtándolle apoios ao grupo tradicionalmente maioritario. A moderación no discurso de Hamás, con vontade de sentar a falar co goberno de Israel, logo de que boicotearan as anteriores lexislativas, apunta a un posíbel goberno de coalición co partido de Mazen.

• Anterior: A Ihad pide o boicot das eleccións palestinas e os EUA din que non aceptarán un goberno con membros de Hamás
• Última hora: Haaretz, Jerusalem Times e Wafa