Vieiros

A taxa de desemprego baixou en 2005 ao 9.13% en Galiza malia a suba do paro no último trimestre. As cifras da Enquisa de Poboación Activa recollen en Galiza un total de 114.300 parados na fin de 2005. Iso supón unha diminución de 18.200 respecto ao mesmo trimestre do ano anterior, un 11.4% menos de paro. Pola contra, no detalle dos datos dese último trimestre de 2005, vemos 4.600 persoas máis desempregadas, incremento do 4.23% respecto ao trimestre anterior.

En porcentaxes variábeis todas as autonomías aumentaron a súa poboación activa nos últimos doce meses, media estatal que queda no 3.2% e que só amosa unha evolución negativa en Galiza, cun recurte de xente en idade de traballar do 0.14%, o que supón 1.700 persoas menos ca o ano anterior. En canto a poboación ocupada, o aumento foi o menor do Estado, cun 1.49%, é dicir, 16.500 traballadores máis.

Por provincias, A Coruña suma o maior número de parados, 48.300, quedando nunha taxa do 9.19%. Pontevedra acumula 42.300 persoas desempregadas, taxa do 9.62%, e a continuación Lugo e Ourense teñen respectivamente 11.100 e 12.300 parados, con taxas do 7.32% e o 9.30%.

A nivel estatal, o número de parados subiu en 76.200 persoas até un total de 1.841.300 desempregados. Iso deixa a taxa total en trés décimas máis ca no penúltimo trimestre de 2005, un 8.7%. Mirando a evolución ao longo dos doce meses, un total de 239.800 sairon do paro nese período.