Vieiros

En números concretos, eliminar ese "efecto sede" que leva a que moitas grandes empresas que están operando en Galiza, caso de Fenosa ou Endesa, leven a súa sede fiscal a Madrid, situación que involucra ademais ao 13% do total dos traballadores galegos, achegaría a Galiza arredor de mil millóns extra cada ano.

Segundo Jorquera, iso leva a situacións irregulares que lle dan estatisticamente á comunidade de Madrid o 47,5% do total de taxas recadadas, malia que o PIB madrileño queda no 17,4% do estatal. Á beira, Galiza recada un 5,1% mentres que o seu PIB é o 5,3% respecto da media. Francisco Jorquera lembrou de paso que o BNG reivindica unha axencia tributaria propia para Galiza.

Rodríguez pide unha Axencia Tributaria Galega
Sobre o asunto falara xa hai uns días Francisco Rodríguez, deputado do BNG no Congreso, na entrevista que recollía a propia web da formación. "Para que haxa autogoberno ten que haber autonomía financeira", subliñara o deputado nacionalista galego.

Rodríguez destacou que os números da recadación fiscal do Estado español en Galiza en 2003 chegan aos 7.600 millóns de euros, "mentres que as transferencias que fai o Estado para os gastos básicos da Xunta de Galiza son 5.600 millóns de euros". Á luz deses números, Rodríguez dixo que "non temos que terlle medo ningún á autonomía financieira".

O deputado nacionalista insistiu especialmente en que co actual modelo, que cualificou de "disparatado", a Axencia Tributaria recada en Madrid "o 49% do total estatal", e lembrou que aló cotizan impostos "sociedades que non operan alí", polo que se Galiza recadase "proporcionalmente todo o que nos corresponde das grandes empresas que operan en Galiza pero teñen a súa sede fiscal en Galiza, o balanzo aínda sería máis favorável para nós".