Vieiros

"Sempre haberá mellores alternativas ca o petróleo, o que quere dicir que ningún fogar necesitará deste tipo de enerxía para obter calefacción e que ningún conductor terá unha única opción de combustíbel". Así o destacou a pasada semana Mona Sahlin, ministra sueca de Desenvolvemento Sustentábel, ao tempo que anunciaba o proxecto do goberno para rematar coa dependencia do país respecto ao petróleo. Na actualidade Suecia cobre a maioría das súas necesidades enerxéticas a través do petróleo, preto do 40%, e da enerxía nuclear e conseguiu xa que a cota enerxética producida polas enerxías renovábeis no país chegue ao 26%, vinte puntos por riba da media da Unión Europea neste apartado.

A meta é que converter a este país de 9 millóns de habitantes no primeiro do planeta que non depende economicamente do petróleo. Con esa fin, un grupo multidisciplinar que integra o sector académico e o empresarial e con representación tamén de colectivos sociais e ecoloxistas e labregos, elabora un informe que será presentado no parlamento do país en poucos meses. As compañías locais de produción de vehículos, Volvo e Saab, xa responderan de xeito favorábel ao proxecto de desenvolvemento de coches propulsados por combustíbeis alternativos. Ademais, a idea do goberno sueco é que o abandono do petróleo non sexa cuberto cun incremento do proxecto nuclear.