Vieiros

En Vilariño de Conso ademais do Entroido é a festa da boa comida, coa VII edición da Festa do Cabrito, o Sábado de Entroido, e non só van poder goza desta carne os visitantes, tamén hai androllas, chourizos, mel, empanadas típicas da zona, bica, montonico, licores caseiros, etc. O domingo, para baixar tanta enchenta chega a festa dos Folións, acompañados de bombos, metálicos, martelos, gadañas, etc. Múltiples sons para celebrar o día dos Boteiros, personaxe típica deste Entroido que se caracteriza por vestirse con traxes de corres, guirnaldas e varas coas que escorrentar e asustar os visitantes; xunto a eles ademais van as señoritas, os vellos, os afiadores e demais personaxes do Entroido.

En Xinzo a festa non é só esta fin de semana, levan dende comezos de febreiro celebrando 'os domingos': o fareleiro o día 5, o oleiro o día 12, o corredoiro o día 19... ata a chegada dos desfiles o venres 24 e o XXIV Festival da Canción Humorística do Entroido; dende entón e ata o primeiro de marzo, cando se enterra a sardiña, todo son desfiles, concursos de disfraces, comparsas, carrozas, etc. O 5 de marzo tamén é importante, aí péchase definitivamente o Entroido, coa celebración do Domingo de Piñata.

Seguimos en Ourense, para celebrar o Entroido e mais o bo xantar. En Laza comeza a festa na medianoite do venres co folión e chega a boa comida o sábado coa 'cabritada'. O día dos Peliqueiros é o Domingo de Entroido, cando tamén se reparte a bica dos Peliqueiros, cando se fai o desfile das carrozas, etc. O Luns de Entroido chegan a farrapada e a xitanada pero ademais baixa A Morena acompañada dunha manchea de formigas. Para repoñer forzas cachucha e viño. O Martes de Entroido o espectáculo póñeno os peliqueiros veteráns, volven as carrozas, lese o testamento do burro, faise o enterro típico de todos os entroidos e gardan (e escenifican) o loito os Peliqueiros.

Os xantares de Entroido sucédense tamén en Viana do Bolo coa Festa da Androlla, o Domingo de Entroido, e tamén segue a festa cos pasarrúas, a imposicións das insignias de ouro da Androlla, os desfiles, as carrozas, os fulións, as comparsas, etc.

Verín e outro dos lugares que celebra o Entroido durante otodo o mes de febreiro. O día 16 celebran o Xoves de Compadres, o 19 o Domingo Corredoiro, o 23 o Xoves de Comadres, ata que por fin chegan os desfiles: infantís, de adultos e colectivos o Venres de Entroido. O día 26, o Domingo Gordo, sáen á rúa os Cigarróns acompañados de múltiples desfiles de carrozas e comparsas; o Luns de Entroido celebran a Verbena do Capullón e volven as carrozas e as comparsas ata o Domingo de Piñata, o 5 de marzo, que en Verín se celebra cun xantar popular.

Na Cidade das Burgas tamén celebran os xoves de Compadres e Comadres e dende o Venres de Entroido sucédense os desfiles, as comparsas, os obradoiros de disfraces e maquillaxes para os máis pequenos da casa e o Domingo de Entroido celébrase unha verbena, un concerto de Entroido e a elección do Rei e da Raíña do Entroido 2006; ata que o 1 de marzo se celebra A Queima da Sardiña. Preto de alí, nas Eiroas, o día 28 de febreiro é importante tamén porque se celebra, dentro da festividade do Entroido, a Voda da Pita.

E xa vai sendo hora de saír de Ourense para achegarse, por exemplo, a Lugo e a Vilaboa. Na capital de provincia as charangas e os concursos de disfraces enchen os días de Entroido pero a elas hai que unir a Feira de Produtos de Entroido, o espectáculo de circo O disparatado mundo de Alonso e as irmás Pampín e, o primeiro de marzo, A Queima da Sardiña. En Santa Cristina e Santo Adrán de Cobres, no concello de Vilaboa, desfilan xunto a un mordomo as madamas e os galáns, ataviados con traxes de base branca enfeitados con colares, sombreiros, flores, plumas, abelorios, etc. Madamas e galáns bailan nas portas das casas para que os veciños contribúan ao mantemento da festa ata que finalmente se escoita o sermón do predicador que resume con humor os acontecementos máis destacados dese ano na vila e no país.