Vieiros

A dura proba de Doha, primeira das pertencentes á Copa do Mundo de triatlón, desenvolveuse baixo un esmagador sol e a máis de 36ºC de temperatura. Nesas condicións, o campión ferrolán atuou os grandes da especialidade e demostrou que despois de tanto tempo está en condicións de desputarlle a vitoria a calquera. De feito, ao remate da proba de nado Gómez Noia ía segundo (18'42"), a só un segundo por detrás do británico Stannard. A transición para a bicicleta non foi tan boa, nin tampouco o percorrido sobre as dúas rodas, onde fixo o 23º mellor tempo, pero Gómez Noia recuperouse para marcar o quinto mellor rexistro na carreira a pé, que lle reportou a décima praza final.

Unha loita contra as circunstancias

O Consello Superior de Deportes recuou a semana pasada no proceso que seguía contra o triatleta ferrolán Xavier Gómez Noia e permitiulle competir nas probas que desexe. Cinco anos atrás un informe da cardióloga do Consello, Araceli Boraíta, determinaba que Xavier Gómez Noia puña en perigo a súa vida ao participar en competicións por causa dunha valvulopatía conxénita. Ao remate deste calvario legal, durante o que puido competir intermitentemente, Gómez Noia regresou en Doha con todas as honras e boa forma ás pistas. Agora a meta está nos mundiais de Lausanne, que se desputarán a finais de agosto nesta cidade suíza con importante colonia galega. Un bo lugar para que Galiza regrese ao cumio mundial deste deporte.

Xavier Gómez Noia é sen dúbida o triatleta galego máis en forma nas últimas tempadas, malia que tivo prohibido competir nesta disciplina deportiva que combina o ciclismo coa carreira a pé e coa natación. Os seus recentes récords galegos de 800m e 1500m na piscina acreditan o seu nivel, pero tamén a excelente campaña que realizou en 2005, cando arrasou no Iron Tour de Francia de triatlón, unha completísima proba por tiradas.

Unha valvulopatía cardíaca detectada hai cinco anos foi a orixe dun longo preito entre distintos doutores e do veto que o español Consello Superior de Deportes lle puxo á súa práctica deportiva nos últimos dous anos. O máis recente paso desta longa cadea de prohibicións fora a exclusión de Gómez Noia dos mundiais de biatlón de Mónaco, en setembro do ano pasado. Hai quince días o Consello Superior de Deportes emitía un informe definitivo sobre a situación do triatleta, polo que se lle permitía competir a todos os niveis baixo a responsabilidade propia, a da Xunta, a da Federación Galega de Triatlón e a dos cardiólogos Nicolás Bayón e William McKenna, que seguen o seu caso desde hai anos. Bayón e McKenna seguirán a súa evolución a partir de agora e determinarán periodicamente se pode seguir competindo ao máximo nivel.

Gómez Noia era unha das principais promesas do triatlón galego. Campión do mundo sub23 en Nova Celandia e oitavo nos mundiais absolutos de Madeira, tíñao todo para chegar ao máximo cume neste deporte seguindo o ronsel de Iván Raña. Pero a decisión federativa obrigouno a cambiar de disciplina e a cavilar con conseguir o pasaporte francés para poder manterse na alta competición. A súa nunca ben explicada exclusión das Olimpíadas de Atenas, ou a do Mundial de biatlón condicionaron a súa carreira deportiva nos últimos meses.

Clasificación en Doha

1º Brad Kahlefeldt (AUS), 1:51'17"
2º Mark Fretta (EUA), 1:51'23"
3º Volodimir Policarpenco (UCR), 1:51'27"
10º Xavier Gómez Noia (GZ), 1:53'00"
Resultados completos