Vieiros

Trátase dunha reivindicación tradicionalmente apoiada por socialistas e nacionalistas e da que os sindicatos subliñan que desta volta servirá tamén coma parte do camiño para responder á "débeda que existe cos traballadores represaliados durante o franquismo". Ao fío, e aínda que o PPdeG decidiu apoiar a reivindicación, desde este partido advertían que é unha proposta que pode "remover vellas pantasmas e feridas".

A maior actividade nesta data chega por parte da Confederación Intersindical Galega, que organizará actividades en todas as cidades galegas. A CIG escolleu destacar este ano a campaña "Sinistralidade laboral, responsabilidade patronal", e chaman por este motivo a concentrarse diante das sedes da Confederación de Empresarios de Galiza. Ao tempo, convocan cadansúa manifestación nas cidades de Vigo e Ferrol.

Lembrámoslles que en 2005 houbo preto dun milleiro de accidentes graves no contorno laboral e case cen mortos, cun índice de mortalidade do 12.5 por cada 100 mil habitantes, moi por riba do 6.7 estatal e do 1.74 de media nos países máis desenvolvidos.