Vieiros

Da evolución de Cyril Ferez, en coma cun traumatismo cranioencefálico trala malleira recibida na manifestación do sábado, podería depender o actual crédito de Sarkozy, que asegurou que a estratexia policial consistía en "tolerar as provocacións", e até o éxito do CPE. En 1986, Mitterrand tivo que retirar unha reforma educativa pola morte dun rapaz. A única morte rexistrada en 1968 foi a dun home que caeu ao Sena, vítima do alcol.

Mentres, os estudantes manteñen a presión e acordaron mobilizarse este martes e o xoves. 3 de cada 4 universidades seguen pechadas, e 313 institutos de secundaria uníronse ás protestas. "Nada é posíbel sen a retirada do contrato, sequera para nós", remarcou Bruno Juillard, un dos rostros mediáticos do movemento estudiantil.

Villepin reúnese hoxe cos membros da UMP. O presidente do centrodereita que goberna Francia, Bernard Accoyer, declarou que na reunión deste martes "Villepin explicará qué pensa facer". Segundo Le Parisien, medita reducir o despido libre a 12 meses, obrigando á empresa a precisar as causas de despido no segundo ano de contrato. O ministro de Economía, Thierry Breton, sinalou que este "é o tempo da adaptación e o diálogo". O senador socialista Jean-Luc Melenchon avisou doutro 68 se non hai cesións gobernamentais. "Francia vive unha insurrección cívica porque os franceses rexeitan unha implantación sistemática do neoliberalismo", dixo.

Máis información en Libération e Le Monde.