Vieiros

O voceiro do PP, Serafín Castellano, destacou que o texto valenciano "amosa que é posíbel avanzar no autogoberno dentro do modelo territorial establecido pola Constitución e reforzando os principios de igualdade e solidariedade, fundamento do Estado das autonomías". Polo PSOE, o seu voceiro Joan Ignasi Pla, comentou que a votación da camara da Comunidade Valenciana reflicte "a consolidación da España plural, que non racha porque se aprobe un Estatuto que recolla un conxunto de competencias moi importantes para o autogoberno".

Desde o grupo mixto, Tomás Puchol, que pasou do PP á Coalició Valenciana, comentou que "mellor sería que aparcasemos cláusulas innecesarias e pedísemos un mellor teito competencial para a Comunidade". Referíase Puchol á chamada "cláusula Camps" que deixa a porta aberta para a posterior modificación do Estatuto valenciano coa fin de incorporar calquera avance competencial adicional que outras comunidades poidan introducir nas súas reformas estatutarias. Puchol tamén cargou contra a Académia Valenciana de la Llengua, acusándoa de estar neste proceso á beira do "catalanismo e da ERC de Carod Rovira". Desde EU-Entesa, o seu voceiro Joan Ribó criticou especialmente a renuncia a introducir a rebaixa desde o 5% actual ao 3% como límite de apoio para que un partido poida conseguir escano no parlamento valenciano.