Vieiros

Segundo relatou Touriño o cumprimento da sentencia implicará a creación dos postos que supostamente cubrían eses contratados, non implicando necesariamente que sexan esas mesmas persoas as que vaian ocupalos automaticamente, de forma que deberán no seu caso pasar por un proceso público con todas as garantías básicas.

"O goberno galego cumprirá as sentenzas xudiciais e regularizará as situacións de forma que non se use este procedemento como subterfuxio para que entren dun xeito non correcto na administración pública a través desas asistencias técnicas". Referíase Emilio Pérez Touriño ao elevado número de persoas vencelladas coa Xunta durante o goberno do PP en Galiza a través dese tipo de contratacións, e malia que non quixo valorar desta volta as prácticas do executivo de Manuel Fraga subliñou que "é preciso garantir que na administración pública se entre de acordo coa lei e a través dun mecanismo baseado na obxectividade, a transparencia e a concorrencia".

O PP defende a "legalidade" destes procedementos
"A contratación de asistencias técnicas na Administración é unha práctica habitual de todos os organismos públicos, que está dentro da Lei de contratos e que deben ser fiscalizadas pola intervención e a asesoría xurídica de calquera administración", insistían este xoves desde o PPdeG ao fío das declaracións do presidente da Xunta. Na opinión dos populares, a razón pola que a xustiza lle obriga agora á Xunta á readmisión destas persoas é porque "o goberno de Touriño, cando chegou a administración rescindiu contratos de asistencia técnica dun número indeterminado de persoas, en lugar de esperar ao remate da asistencia técnica contratada".