Vieiros

Un ano despois da estrea de "Hai que Botalos" e logo de máis de 365 días do lanzamento da súa web, Arredemo presenta baixo o nome provisional de "Hai que evitalos / A toda costa" a súa nova iniciativa coa que tentará denunciar os proxectos urbanísticos incontrolados que están a ameazar as costas de Galiza. Nos últimos meses, tanto a prensa como o blogmillo veñen informando sobre a intención de moitas construtoras de converter o litoral galego nunha nova Costa do Sol e non son poucos os colectivos que están a denunciar estes casos. Porén, Arredemo teme que a industria do formigón silencie aos grandes medios de comunicación e por iso formula este novo proxecto. Aínda en proceso de xestación, a iniciativa seguiría a mesma estrutura que Hai que Botalos; realización dunha serie de curtametraxes e a súa posterior proxección e difusión nas datas anteriores aos comicios. O obxectivo: "advertir a clase política e empresarial de que a cidadanía está alerta e que vai traballar para que non se estrague o noso ecosistema e as nosas paisaxes".