Vieiros

Eva Castro (SCR Specialized) acudía a Fort William coa ilusión de coarse unha vez máis entre as dez primeiras ciclistas do mundo e, quizais, coa posibilidade de mellorar a excelente sexta posición colleitada en Vigo. Pero Castro non contaba con que Iberia lle ía perder a bicicleta no aeroporto de Barcelona e que esta non chegaría a tempo para a competición. A compañía aérea española insistiulle á mellor ciclista galega que disporía da bicicleta para a hora da proba, pero despois de citar a Castro en Glasgow para que a recollese dúas horas antes dos adestramentos oficiais, a bici non apareceu.

Castro tivo que correr cunha bicicleta emprestada, dunha talla superior á que emprega habitualmente e máis pesada. Aínda así, competiu en cuartos contra a checa Jana Horakova, contra a australiana Katrina Miller e contra a alemá Carolina Pasedach, e quedou terceira a moi pouca distancia da australiana. A checa sería segunda na clasificación final, mentres que a australiana foi cuarta. Eva Castro quedou finalmente posicionada de 11ª, e agora é novena na xeral da Copa do Mundo. En Fort William tamén competiu, pero en descenso de montaña, a viguesa Violeta Janeiro, que non puido pasar das roldas previas e que ocupou finalmente a posición 31ª.

A compañía Iberia volveu perderlle a bicicleta a Eva Castro á volta cara á Coruña. Cando apareceu fíxoo "con bastantes desperfectos, cos radios da lamia rotos, co disco de freno torto, cun golpe no chasis da bicicleta e con diversos guichos na pintura". A seguinte proba do calendario despútase esta mesma fin de semana, na cidade alemá de Willingen, onde a oleirense acode para recuperar as posicións perdidas. Tamén estarán nesta terceira cita Xurxo Aguín (41º do mundo) e Violeta Janeiro (22ª).