Vieiros

Exemplo da situación é o acontecido o pasado 6 de xuño no propio Parlamento de Castela e León, cando Felipe Lubián, deputado do PSOE, lle perguntou ao goberno por esta situación e o propio conselleiro de Educación respondeulle no pleno defendendo a prohibición do uso do galego nas aulas de Lubián e argumentando que "na escola fálase castelán e o galego fálase fóra ou nos recreos".

Desde A Mesa láianse de que o propio centro escolar xustifique as cancelas ao galego como "medida pedagóxica", en palabras do director, e cualifican de "aberrante" que un docente vexa pedagoxía na "minusvaloración e prohibición dunha lingua propia", o que como subliñan desde o colectivo, "ademais de antipedagóxico, supón unha vulneración de dereitos fundamentais".

O presidente da Mesa, Carlos Callón, dirixiuse por carta ao presidente da Junta de Castela e León, Juan Vicente Herrera Campo, e ao conselleiro de Educación, Francisco Javier Álvarez Guisasola, para reclamarlles que "finalice esta intolerábel prohibición do galego" e se cumpra o artigo 4.2 do Estatuto desa comunidade que di: "Gozarán de respecto e protección a lingua galega e as modalidades lingüísticas nos lugares en que habitualmente se utilicen".