Vieiros

"Este accidente ferroviario volve poñer a atención sobre o abandono da nosa rede convencional ferroviaria", lembran desde esta formación sindical, "independentemente das causas que puidesen acontecer neste tráxico accidente, é imprescindíbel denunciar a evidente falta de interese cara a todo o que non sexa construír novos corredores de alta velocidade".

Desde a Confederación Xeral de Traballo apuntan que en principio a liña onde se produciu o accidente suponse que conta cos maiores estándares de seguridade, "dobre vía electrificada, sistema ASFA, comunicación tren-terra, dispositivos electrónicos nas estacións e bloqueo automático. Con todo, aproveitan para recordar a falta de traballadores, causada polos expedientes de regulamento de emprego aplicados en Renfe e nas empresas ADIF e RENFE-Operadora, "eliminando personal de control e seguridade da circulación nas estacións, recurtando xente de mantemento de vehículos de material convencional e reducindo os encargados de revisións na infraestrutura ferroviaria". Todo isto, en opinión da CXT, contribúe a recurtar a seguridade ferroviaria nas liñas convencionais.

Ao fío, agardan que o informe técnico sirva para botar luz sobre o acontecido e esperan que "a investigación sexa transparente e non derive en actitudes vistas anteriormente nas que se imputa unha empresa a outra as causas do accidente, evitando responsabilidades". "Hai que lembrar continuamente que o ferrocarril é un servizo público e que como calquera outro hai que conservalo e mantelo en boas condicións, mellorando os sistemas de seguridade, infraestruturas e material rodante, á marxe de criterios mercantilistas que son diametralmente opostos á seguridade ferroviaria, xerando situacións de risco para traballadores e usuarios", afirman.