Vieiros

Foron cando menos un cento de presos os que oficialmente recoñece o goberno dos Estados Unidos que pasaron polas prisións secretas que ten en todo o mundo. Segundo o presidente George W.Bush, 14 presuntos líderes da rede Al Qaeda foron trasladados estes días desde eses centros até a base de Guantánamo, onde o exército dos EUA retén fóra da legalidade internacional a preto de medio milleiro de persoas. De paso, e malia que o Pentágono viña de publicar un novo manual onde aseguraba que se eliminarían as prácticas cualificadas de tortura por colectivos en defensa dos dereitos civís, Bush asegurou que o programa de detencións e interrogatorios secretos non se vai suprimir e pediulle apoio ao Congreso para a creación de "comisións militares xudiciais" que poidan actuar fóra das esixencias da Convención de Xenebra. "Somos unha nación en guerra e necesitamos información", dixo. Poden ampliar no Washington Post e naCNN.

• Anterior: A investigación da Eurocámara atopa que a CIA usou o aeroporto de Peinador