Acciona sorprendeu onte pola tarde o mercado comprando o dez por cento de Endesa a un prezo de 32 euros por acción, nunha operación que financiou o Banco de Santander e que ascendeu a un total de 3.388 millóns de euros. A construtora madrileña non descarta ampliar esta participación ao 25 por cento, aínda que coa porcentaxe adquirida onte xa iguala a Caja Madrid como primeira accionista da eléctrica. Complícase así máis aínda o proceso o proceso de opas iniciado hai un ano por Gas Natural e que foi respondido máis tarde coa contraoferta da alemana E.ON, que cada vez ten máis difícil facerse co control de Endesa. Precisamente hoxe coñécese a resposta da Comisión Europea sobre as condicións impostas pola Comisión Nacional de Enerxía á empresa alemana, que poderían ser incompatíbeis coa lexislación comunitaria.